بلوچ اسٹوڈنٹس پَرنٹ ءِ بُنجاھی جارکش ءَ وتی درشان ءِ تہ ءَ گْوشتگ کہ شھمیریں سبا دشتیاری ءُ نمیرانیں ھیر بکش مری بلوچ دو انچیں کارِست اَنت کہ آیاں وتی تیوگیں زِند پہ بلوچ راج ءِ باندات ءِ واست ءَ ندر کُرتگ، آیانی بے بھائیں جُھد پہ بلوچ راج ءَ یک مزنیں ارزشتے دار اَنت۔ آئی ءَ بی ایس ایپ ءِ تیوگیں ھنکیناناں پیام داتگ کہ یاتگاری مراگش برجم بہ دار اَنت۔
بی ایس ایپ ءِ بُنجاھی جارکش ءَ تران کنان ءَ گْوشت کہ مروچیگیں روچ بزاں یک جلکان یک انچیں کارستے ءِ نمیرانی ءِ روچ اِنت کہ اِے روچ پہ بلوچ راج ءَ یک سیاھیں روچے ءِ نام ءَ زانگ بیت کہ اِے روچ ءِ تہ ءَ یک ابدمانیں کارستے ءُ بلوچ راج ءِ کندیل شھمیریں سبا دشتیاری شھید کنگ بیت۔ دژمن ءَ آئی ءَ را گْوْنڈلیں تیرانی آماچ کرت بلے آئی ءِ پگر ءُ لیکہ انگت زندگ اِنت ءُ واجہ ءِ نام راجدپتری تاکانی تہ ءَ گْوں بُرزشانیں لبزاں نبشتہ اِنت۔
آئی ءَ گْوشت کہ شھمیریں سبَا دشتیاری وتی تیوگیں زِند پہ راج ءِ دیمروئی ءُ ورنایانی سرپدی دیگ ءَ گْوازینت، آئی ءَ لبزانک ءِ پِڑ ءَ بے بھائیں جُھد کرتگ، بلوچی لبزانک، راجدپتر، رجانکاری ءُ دگہ بازیں سرھالانی سر ءَ کِساس بیست ءُ چار 24 کتاب نبشتہ کرتگ۔
واجہ ءَ پہ بلوچ ورنایانی وانگ ءِ ھاتر ءَ ملیر ءَ “سید کتابجاہ” جْوڑ کرتگ کہ بازیں بلوچ نودربرے وانگجاہ ءَ اِنت۔ واجہ ءَ لبزانک ءَ ابید راجکاری ءِ پِڑ ءَ ھم بے کساس جُھد کرتگ ءُ بلوچ ورنایاں گْوں ھمگرنچ بوتگ ءُ آیانی رھشونی کرتگ۔ بازیں وھد ءَ آئی ءِ توار ءِ بند کنگ ءِ ھاتر ءَ واجہ ءِ دیم ءَ اڑاندھی اْیر کنگ ءِ کوشست بوتگ بلے شھمیریں سبا چہ وتی پگر ءُ لیکہ ءَ ھچ یک گامے ھم پُشت نہ کنز اِتگ، مروچیگیں روچ آئی شھمیری روچ اِنت آ جسمانی پِڑ ءَ چہ ما جُتا اِنت بلے آئی ءِ پگر ءُ لیکہ گام پہ گام بلوچ نودربرانی رھشونی ءَ کنگ ءَ اِنت۔
دیمتر ءَ آئی ءَ گْوشت کہ نواب ھیربکش مری پہ بلوچ راج ءَ یک پیامبر ءِ تبکے دار اِیت، آئی ءَ پہ راج ءِ باندات ءِ واست ءَ وڑ وڑیں جنجالیانی دیمپانی کرتگ بلے آئی ءَ وتی زند ءِ گُڈّی روچاں ھم وتی جھد برجم داشتگ ءُ راج ءِ رھشونی کرتگ کہ مروچی آ بلوچ راج ءِ تہ ءَ را بابائے بلوچستان ءِ نام ءَ زانگ بیت۔ واجہ ءِ رژنائیں پِگر ءِ چَپّیں پَھنات ءِ منوگریں زوراکاں آئی ءَ را چہ ڈیھ ءَ بدر کرتگ ءُ آئی ءَ بازیں وھدے درملک ءَ اوگانستان ءَ گْوازیتگ، وھدے کہ جاور گیگ بوتگ اَنت آ واتر اتکگ ءُ پد ءَ راج ءِ رھشونی کرتگ ءُ وتی جُھد ئِے برجم داشتگ۔
Discover more from Balochistan Affairs
Subscribe to get the latest posts to your email.