چندن ساچ
من کتابے نبشتہ کت۔ زند کہ بیت لبزانک بیت۔ برے برے لبزانکی مردم دوچار کپ اَنت، گڑا ھمے جُست ءَ کن اَنت کہ تو چے گوش ئے، لبزانک ءِ سپر ھجبر ھلاس نہ بیت؟
من پسو دَیاں کہ اِنّاں، لبزانک ءِ سپر ھجبر ھلاس نہ بیت۔ ھو یک چیزے است، آ لبزانک ءِ تَھر ءُ دروشم اَنت کہ اِے چیز وھد ءِ ھمراھی ءَ بدل بُوان بنت۔ ھزاراں سال پیش ءِ لبزانک دگہ وڑ بوتگ ءُ مروچی دگہ کالبے ءَ اِنت۔ دگہ ھزاراں سال ءِ گوزگ ءَ پد لبزانک ءِ دروشم بدل بیت۔ بَلے لبزانک ءِ سپر آسر نہ بیت۔ اے زمین ءَ دانکہ انسان است، لبزانک ھم بیت، آ نوں کجام دروشم ءَ یا کجام تھر ءَ بیت، اِے زانگ نہ بیت۔ بگندئے پلمے ءَ، پوٹوے ءَ یا کہ گیمے ءَ، بلے من اینچو دلجماں کہ لبزانک پش کپیت۔ لبزانک ءِ بدلی ءِ ھمے جار ءَ جاپان ءِ نام داریں گدار نبیس ءُ آزمانک کار ہاروکی موراکامی مروچی اِے رنگ ءَ جَنگ ءَ اِنت کہ “من انونیں دَؤر ءِ نبشتہ کارے یاں۔ منی دَؤر چہ کافکا ءِ دَؤر ءَ جتا اِنت۔ آ وھد ءَ مردمانی کِرّ ءَ ساز ءُ زیمر بوتگ، کتاب بوتگ ءُ کسمانکی دیوان بوتگ اَنت۔ بلے نوں مئے کِر ءَ انٹرنیٹ اِنت، پلم انت، رینٹل ویڈیو ءُ دگہ بازیں چیز اَنت۔ نوں مئے بزانکہ کسہ نبیسانی کار گران تر بوتگ۔ مزنیں جیڑھاں چہ یک جیڑھے وھدئیگ اِنت۔ نوزدھمی کرن ءِ مردمانی کَرّ ءَ وھد بوتگ، من ھما مردمانی گپ ءَ یاں کہ آیاں ونتگ، کسمانک چار اِتگ ءُ کسہ گوش داشتگ، پمیشکا آیاں مزن مزنیں کتاب ھم ونتگ اَنت۔ بَلے نوں ھر یکے دز گٹ اِنت ءُ گوں وتی جند ءَ مان گیش اِتگ۔ نوں زندگی ءَ را آ رنگیں چاروک ءُ لذت زروک نیست کہ وھد ءَ بوتگ۔
موبی ڈک یا کہ دوستوئیفسکی ءِ وانگ وَ شَرّیں کارے بلے نوں مردم اَنچو دز گٹ اَنت کہ آیاں پہ ایشاں وھد نیست۔ پمیشکا فکشن ءَ گوں آشوبے ءَ وت ءَ بدل کتگ۔ نوں مارا مردمانی گردن گرگی ءُ اِے نیمگ ءَ جَپّگی (ژپّگی) انت ءُ آیاں گوشگی اِنت کہ دلگوش ءَ اینگو گور بکن اِت۔ انونیں نبشتہ کار دگہ بازیں رھبنداں کار گرگ ءَ انت۔ جاز، ویڈیو گیم ءُ اے دگہ چیزاں۔ منی ھیالاں مروچاں چہ آ دگہ چیزاں ویڈیو گیم، فکشن ءَ گوں گیشتر دپ کپیت”
یک مزنیں نبشتہ کارے اِے بدلی ءِ جار ءَ جَنگ ءَ اِنت۔ نوں فکشن چونیں راھے گیپت اِے زانگ نہ بیت، بَلے یک گپے است کہ کسہ پشکپیت۔ کسہ بال نہ کنت ءُ ھچ جاہ ءَ نہ روت۔ دانکہ اِے زمین ءَ یک انسانے است آئی ءِ دل ءَ کسھے الم سر کشیت۔ کسہ کہ پش کپیت گڑا لبزانک دگہ چی یے؟
مویان لبزانک ءِ دنیا ءَ مزنیں نامے آ جاھے وتی گلگدارے ءَ گوشیت کہ “لبزانک انسان ءِ رُو ءِ وردن اِنت”. انسان ءِ رُو ءَ بے وردن ءَ کجا بیت؟ لبزانک ءِ سپر مروچی ئیں سپرے نہ اِنت۔ اِے مارا چہ کرناں گون اِنت ءُ پیداک اِنت۔
مارگریٹ ایٹ ووڈ وتی گلگدارے ءَ گوشیت
” انسانانی چشیں چاگرد نیست کہ اود ءَ تو آرٹ ءَ نہ گندئے۔ انسان ءِ تاریخی سپر ءَ مارا امینچو کہ سرپدی رستگ، اود ءَ مردم چہ آرٹ ءَ جتا نہ بوتگ انت۔ آیاں بت تراشتگ۔ ما اِے ھم گوشت کنیں کہ آیاں سوت جتگ، کسہ آؤرتگ۔ چہ اے چیزاں زانگ بیت کہ آرٹ چہ بندات ءَ انسان ءِ ھمسپر اِنت”
ما کہ دنیا ءِ کوھنیں کسھاں وانیں یک چیزے ءِ گمان بیت کہ بازیں کسھانی روتگ یک اِنت۔ کسھاں سپر جتگ ءُ پد ءَ ھر چاگرد ءَ کسہ ءَ را وتی دودانی ھساب ءَ یا وتی تب ءُ مئیل ءِ ھساب ءَ پشکے گور ءَ داتگ۔ دنیا ءِ بازیں مذھباں انچیں کسہ است کہ آیانی بندیک ءِ سر ھم یک اِنت۔
لبزانک زی ھم بوتگ مروچی ھم است ءُ باند ءَ ھم بیت۔ پرچا کہ انسان ءِ ارواہ ءَ یک جاھے ءَ بندی بُوّگ وش نہ بیت۔ دانکہ انسان ءِ ارواہ جنزان ءُ روان اِنت آئی ءِ سیل ءُ سوادانی زیبائیں دنیا ھم ھمے وڑ ءَ آباد اِنت ءُ اے زیبا ءُ آبادیں دنیا ءِ نام لبزانک اِنت۔
Discover more from Balochistan Affairs
Subscribe to get the latest posts to your email.