اعجاز جنگی
۱۱، اگست ۲۱۰۴ءَ حاجی عبدالقیوم پبلک لائبریری سراوان پنجگور ءِ کہ ما بُن ھِشت ائیر کُرت ۔ ھما روچ ءَ مئے گوں سنگتاں ھمے شور ءُ سلہ بُوتگ کہ ما واجہ عبدالقیوم بلوچ ئِے پِگر، سوچ آئی ھما فلسفہءُ سسّا ءَ دیم ءَ براں داں نوکیں نسل ءَ را سر کناں کہ عبدالقیوم بلوچ ءَ پہ وتی قوم، بلوچ راج ءُ پہ بلوچی زبان ءَ چے کُرتگ ءُ آئی واھگ چے بُوتگ اَنت۔ ما وتی اے کارءِ تہا داں کَچّے ءَ سوب مند بُوتگ ایں۔
گَپّ سرھال ،واجہ غازی امان اللہ ءِ کتاب ’’لال یاقوت‘‘ ئیگ اِنت۔ ۲۰۲۱ءِ سال ءَ یک روچے ما حاجی عبدالقیوم پبلک لائبریری ءَ نِشتگ اِتاں، چہ بلوچی اکیڈمی کوئٹہ ءَلائبریریءِ ھاترا بازیں کتاب اَتکگ اَت۔ ھمے کتابانی تہا بازیں کتاب دومی رندءَ چھاپ بُوتگ اِتاں، گڑا منی دل ءَ ھمے گپّ اَتک کہ بائدیں واجہ امان اللہ ئِے ھما کتاب ’’ گیدی کِسّہ سیمی‘‘ کہ چہ بلوچی اکیڈمی کوئٹہءَ ۱۹۷۱ءَ چھاپ بُوتگ، نُوں دُوارگءَ دومی بہر ءَ چھاپ بہ بیت۔ گڑا من وتی دلدوستیں سوجکار پروفیسر سنگت رفیق صاحب ءَ را فون کُرت کہ واجہ اے وھداں بلوچی اکیڈمی کوئٹہ ءِ چئیرمین اِنت۔ آئی ءَ را گُوٛشت کہ بلوچی اکیڈمی ءَ چے کوٛھنیں بازیں کتاب دومی بہر ءَ چھاپ بُوتگ، بلے واجہ غازی صاحب ئِے کتاب ’’ گیدی کسّہ سیمی‘‘ دوارگءَ چھاپ نہ بُوتگ ءُ مئے دیم ءَ نیاتکگ۔ سنگت رفیق صاحب ءَ منءَ گُوٛشت کتاب ءِ کاراں بکن من چھاپءِ کن آں ۔ پدا من گُوٛشت کہ واجہ ئِے دگا ھم یک کتابے کہ ہزار بتل اَنت چھاپ نہ بُوتگاں۔ سنگت صاحب ءَ گُوٛشت کہ تو کمپوز اِش بکن دیم اش دئے۔ گوں سنگت رفیقءَ من واجہ غازی صاحب ءَ گپ پرمات، واجہ ءَ وشات ءُ برامات کُرت ءُ منت گِپت۔ گڈ سرا سنگت رفیق صاحب پہ مسکرائی گُوٛشت واجہ غازی صاحب ءَ را کہ واجہ ! تو من ءَ دل نبئے پہ گُوشگءَ، بلے من اعجاز جنگی ءَ حبر دیاں، شما پنجگوری گپّ کنئے بلے کار نہ کنئے، واجہ غازی صاحب ءَ گوٛشت کار کناں زُوت پہ شما کتاباں دیم دیاں۔ من گوں سنگت رفیق صاحب ءَ کمو وھد گوازینتگ ، بلے ھمے کمیں وھدانی تہا من ھمے دیستگ اَت کہ آ چونیں سوجکارے ءُ آ چونیں مہروانیں انسانے۔ باز مہروانیں انسانے ہر ھما مردمءِ تب ءَ زانت ءُ سرپد بیت وتی مہراں درشان کنت۔ گڑا سنگت رفیق صاحب ئِے گپاں چے رند، ھما روچءَ من گوں وتی سنگتاں ’’ گیدی کِسّہ سیمی‘‘ ءِ کار بندات کُرت آئی ءَ را کمپوز کُرت دیم دات۔ دومی ’’ لال یاقوت‘‘ گوں ہزاریں بتلاں کمپوز کُرت ءُ دیم دات۔ کمپوز کنگ ءُ دیم دیگ ءَ رند پدا چہ بلوچی اکیڈمی کوئٹہ ءَ کتاب واتر کنگ بُوت۔ءُ دیم اِش دات کہ بتلاں الف واری ترتیب اِش بداِت، گڑا ہزاریں بتل پدا ما ’’ ا، ب ۔۔۔۔ ‘‘ واری ترتیب دات ءُ دیم داتاں۔ لہتیں روچ ءَ رند مارا کتاب پدا واتر کنگ ءُ دیم دیگ بُوت کہ مئے کِرّا بتلانی کتاب اَست ہر یک بتلے ءِ دیم ءَ آئی بزانت(معنی) ءُ مکسد نبشتہ اَنت۔ شما اے کتاب ءَ گوں پُژدرءُ بزانتاں نبشتہ بکن اِت۔ ’’شَرّیں کارے لکو کُرت‘‘۔ ما باز پریشان بُوتاں کہ اے ہزاریں بتلاں چہ کجا بزانت ءُ پُژدر بدیاں۔ پریشانی ءِ مستریں سوٛب ایش اِنت کہ اے کتاب بزاں ہزاریں بتل واجہ غازی صاحب ءَ را ۱۹۸۵ ءَ چے پیسر ’’ ڈاکٹر ابو یحی ٰ ،مولوی محمد قاسم عینی بلوچ‘‘ نامیں مردے ءَ سوگات داتگ اَنت۔ اے تیوگیں بتل رخشانی گالوارانی تہا نبشتہ اَنت۔ ما ھیران بُوتاں کہ ایشانی بزانت ءُ پُژدراں چوں نبشتہ بکنیں۔
ھئیر۔ من ءُ واجہ غازی صاحب نِشت گالاناں یک پہ یکءَ چاران کُرت، گالاناں پہمگ ءِ جھد کُرت ءُ بزانت دیان کُرت۔ بازیں ہنچیں گال بُوتگاں کہ وس کُرتگ آیانی بزانت نیست۔ سید گنج ءِ تہا نیست، واجہ جان محمد دشتی ءِ بزانت بلد(ڈکشنری)ءِ تہا گالانی بزانت شوھاز کُرتگ، ایشی تہا ھم نیست، خارانءَ مارا بازیں سنگت اَست آیاناں فون کُرتگ ءُ بتل گوٛشتگ اَنت، گڑا آیاں وتی کماشاناں جُست پُرس کُرتگ گڑا کماشاں ھمے گوٛشتگ کہ اے باریں چنکس سال ساری ءِ بتل ءُ گال اَنت، پہ جنجالے آیاں لبزانی ءُ بتلانی بزانت ءُ مکسد گوٛشتگ اَنت۔ کجام بتل کہ ما وت پہمتگ آیانی بزانت ما وت نبشتہ کُرتگاں۔ اے بتلانی بزانت ءُ مکسد کہ من نبشتہ کُرتگ اَنت، چُشکہ آیانی ھما اَسل پُژدر ءُ مانا اَنت بگندئے آ جاہ ءَ مار سر نیاں، چیا کہ ھما گالءُ بتل کہ ھما ہند ءُ دمگانی اَنت، ھما ہندانی مردم چے کہ گنداں ءُ ماراَنت آیانی نیکراہی کِرد، وئیلءُ واکیات، تاریخی کارپد، جنگءُ جدل ، مہرءُ دوستی چے کہ بنت ھما ہندانی کوّاسیں مردم ھما وڑیں گال، بتل ، شعرءُ کِسّہ گوٛشنتءُ نبشتہ کناں، آ وتی ھما ہندی لہجہ ءُ زبان ءَ گپّ کناں۔ ’’ لال یاقوت‘‘ ءِ بزانت کہ ما نبشتہ کُرتگ اَنت، ما لس زبان ءَ گوں آسانیں بزانت ءُ معنیٰ ءَ نبشتگ اَنت کہ ہرکس وانت ءُ پہم اِت بکنت۔ بُوت کنت کہ ایشانی پُژدر مزن، گیشتر ءُ دگا بہ بنت، بلے ما جھد ھمے ھاترا کُرتگ کہ لس مردم ءُ حاص مئے نوکیں نسل ءُ نودربر گوں آسانیں لبزاں گوں وانت اِش بکن اَنت۔
’’لال یاقوت‘‘ ءِ بتلاں چے نودربر ءُ آؤکیں نسل بازیں سیت ءُ نپ زُرت کناں، آیاناں بازیں پنت ءُ سکین رست کنت۔ اے ھاترا کہ اَستیں رھبنداں گوں آسانیں بزانتاں نبشتہ اِنت۔ اخلاقی پنت رسیت۔ پہ درور۔
’’مردءِ زینت اخلاق اِنت‘‘ اگاں مرچیگیں دورءِ تہا ما بچاریں کہ انسانےءَ را اخلاق بیت گڑا آ ہرکسی دل ءَ جاگہ کنت، گوں آئی ہرکسءَ مہر بیت۔ اگاں نا کس آئی جُستءَ نہ کنت، بد اخلاقءِ گون ءَ ہرکس کُندہی بیت۔
’’مردءِ سیال کمال اِنت‘‘ مرد گوں وتی عزت ءُ کمال ءَ زانگ بیت۔ مرد ءَ را کہ کمال بیت گڑا آئی پجّارھمائی تہا اِنت، ہرکس کمالی مردم ءِ سیال اِنت۔ کتاب مزن اِنت تیوگءَ درور دیگ نہ بیت، ہزار بتلانی کتاب اِنت۔ مارا بازیں سرپدی ءُ پنت رسیت۔
راجی پنت: ۔ ’’ قوم ءُ راج مرد ءِ کوٹءُ کلات اَنت‘‘۔ مردانی، راجانی آیانی پجّار کوٹ ءُ کلات اَنت ، آیانی ربیدگ اَنت۔
’’قوم ءُقبیلہ مردءِ حیلہ و سیلہ‘‘۔ قوم ، زبان ، ربیدگ ، ہند ءُ جاہ مردمانی پجّار اَنت۔
’’قوم داری بلہ داری‘‘۔ قوم ءِ دارگ ءَ، قوم ءِ سروگی ءَ مزنیں زانشت ءُ زانتکاری، ہاٹیءُ اوپار ءِ لُوٹیت، قومانی دارگ ءُ سروگی ءِ ھاترا مزنیں دور پہمی ءُ سوچ لُوٹیت۔
’’قوم ءِ عزت ءَ قیمت مکن‘‘۔ گوں قوم ءَ دگا بازی ءُ غداری مکن ، قوم ءِ سوداءَ مجن۔
چُشیں بازیں بتل اَست کہ مارا آیانی تہا ہروڑیں پنت ءُ سکین رسیت۔ اگاں کتاب ءَ کہ گوں پہمیدگی ءَ ما وانیں آئی ءَ چے ما بازیں چیزے دربُرت کنیں ءُ وتی نسل ءَ را سرپدی دات کنیں۔ کجام جاہ ءُ دیوانے کہ بیت گڑا اُودءَ ما وتی ھما گپّاں شَرتِر ءُ وشتر کُرت کنیں۔
چُشکہ۔ “شام ءِ کارءَ پہ سہب ءَ، سہبءِ کار ءَ پہ شام ءَ مدار‘‘۔ ایشی تہا بلائیں پنت ءُ سکین رسیت، ہرھما کاری مردم ءَ را ، اگاں مزدور ءُ نوکرے بیت، یا افسرءُ نودربرے بیت ، ہر ھما کار ھما وھد ءُ ساھت ءَ کنگ لُوٹیت سوب مندی رسیت۔ جان دُزّءُ بے جوہری ناکامی ءُ تاوان اِنت۔
’’ شاہی مرداں پہ ناکس ءُ بے سراں آزار مہ کن‘‘۔ وتی سروگ، زانتکار، کواس ءُ مستریناں پہ بے بستار ءُ بے عزتیں مردمانی ھاترا ناراض ءُ دل آزار مکن۔
’’ شوق یک نشہے‘‘۔ گوں کجام کارءُ چیزے ءَ کہ ترا شوقءُ مہر بُوت، آ آسر بیت ءُ ترا منزل ءَ بارت۔ اگاں آ کار شَرّ اِنت یا خراب، بلے شوق ترا منزل ءَ بارت۔ اگاں یک نودربرے ءَ را گوں وتی وانگ ءُ زانگ ءَ شوقءُ مہر بہ بیت گڑا آئی آکبت رُژناہ بیت، آئی باندات آسودگ ءُ آسرات بیت۔ ھمے ھاترا گوں بلوچ راج ءَ ، حاص گوں نودربراں ھمے گوٛشگ ءُ اَرز بندی اِنت کہ اے کتاب’’لال یاقوت‘‘ ءَ بُوان اَنت اَچ آئی ءَ چے سیت ءُ نپ چِست بکن اَنت ءُ وتی ماتی زبان ، وتی دودربیدگ، وتی راجی بامرد، وتی گوٛستگیں ندکار ءُ راجدپتر ءَ پوہ ءُ سرپد بہ بنتءُ وتی آؤکیں زندءَ پہ رھبندے بُگوازین اَنت ءُ آسرات بہ کن اَنت۔
انسان ھچ اَچ وتا سرجم نہ اِنت، بلے انسان ءِ ہر وھد ءَ جھد ءُ کوشستے پہ وتی کامیابیءُ دیمروی ءَ۔ بگندئے ’’لال یاقوت‘‘ اَچ رَدی سر ریچ بہ بیت ، بلے گُلیں وانوک ءُ چاروکانی سوج ءُ سلہ سرءُ چماں۔
بلوچ، بلوچی سبز بات۔