عالیہ شاہ
آ گُْشیت کہ زندگی یک مُساپر یے، بلئے من گُشاں زندگی سفر یے ءُ ما ءُ تو مساپراں، ہما کہ زندمان ءِ گرم ءُ جلّیں نیم روچاں راہسراں دوچار کپ اَنت ءُ پدا ہر کس دیم پہ وتی منزل ءَ روت گار بیت ءُ پدا واتر نہ بیت ہما مساپر اَنت۔۔۔
ہما ساہگ کہ روچ ءِ رُژنائی ءَ ہمراہ اِنت شپ ءِ تہاری ءَ ہمراہداری نہ کنت مساپر یے، جند ءِ ارواہ کہ زِرد ءِ دمکاں در کیت ءَ بے تواری ءَ روت آ مساپرے۔۔۔۔
زندگی ءِ تہا ہر وڑیں مردماں گوں سر کپیت، لہتیں وشی ءِ مستاگ، ءُ لہتیں غمانی سوگات بنت، چیزے مئے تہا پشت کپیت آ اُوں مساپر اَنت۔۔۔۔
ہما بالی مُرگ کہ منی لوگ ءِ پیژگاہ ءَ کائینت آپ ءُ دان چِن اَنت ءُ وارنت پدا بانزلاں وتی پچ کن اَنت ءُ بال کن اَنت دگہ ہلک ءُ میتگاں سر ءُ شاہاں وتی کشنت۔۔۔۔ آ مساپر اَنت۔ ہما ہمراہ کہ سُہب ءَ بیگاہ نہ کنت گوں ترا آ مساپر اَنت۔۔۔۔
روچ کہ روزرد ءِ زانسراں شپ ءِ سیاھیں چادر ءَ وتا مان پوشیت ءُ سرا ایر کنت ءُ واب کپیت آ مساپرے۔۔۔۔۔ آ گُْشیت کہ منا تو سک دوست بئے، بلئے من گُشاں کہ ما اھد ءِ مساپراں، ترا ساہگ نیست ءُ منا بے تو ساہ مان نیست۔۔۔۔ وہدیکہ ما دست مں دست مہ باں گڑا ما ہر دو مساپراں ءُ مساپراں۔۔
Discover more from Balochistan Affairs
Subscribe to get the latest posts to your email.