آزمانکار: عالیہ شاہ
ماہکان چو تاک چنڈے درچک ءِ تاکانی وڑا زرد ءُ گیمُرتگ اَت ءُ وتی بان ءِ کُنڈ ءَ انچو نشتگ اَت کہ گُشئے انوں درچک ءَ چہ سِستگ ءُ کپتگ۔۔۔
آ مُچّی ءِ تہا ہم ایوک اَت ءُ وشیانی تہا ہم ابیتک ءُ بے چاڑ اَت۔۔۔ وتی ہمسراں چہ مدامی دُور اَت، آئی ءِ مات ءَ ہر وہدہ ءَ گُشت کہ تلّی خرگوش یے گْہاراں گوں ہور نہ بیت۔۔۔ ھَو آ چہ میتگ ءِ سرجمیں کاڑاں جتا اَت آئی ءَ گوں کس ءَ کار نیست اَت۔۔۔
پرچا کہ ماہکان ءِ وتی جند ءِ اندر ءَ تاروکی اَت، ابیتکی ءُ بے چاڑی اَت۔۔۔ آ چہ وتی ایوکی ءِ مجلس ءُ دیواناں گار ءُ بیگواہ اَت۔۔۔
یک روچے سک گرم اَت لین ءُ آپ نیست اَت میتگ سرجمیں مہلوک آپ ءِ شوہاز ءَ سر سر ءُ دان دان اِت اَنت، ایندگہ درائیں جنیں آدم ءُ ہمسریں جنک ماہکان ءِ لوگ ءَ کاپر ءِ چیرا نشتگ ءُ گُد دوچی ءَ اِت اَنت کندگ ءُ مسکرا اِت اَنت، بلئے آ اے گرم ءَ ہم وتی بان ءِ تہا ایوکا نشتگ اَت ءُ دپ ئِے بند اَت۔ کس ءَ گوں آئی ءِ کار ءَ کار نیست اَت۔۔۔اناگہہ ءَ کسّان ءُ ڈولداریں شروکیں بچکے اتک ءُ سلام ءُ دعا یے کُت گوں نشتگیں جنین آدماں ءُ آئیاں چہ جست کت یے کہ ناکو مزار ءِ لوگ ہمیش اِنت نا؟پیریں ماتی ءَ پسّہ دات کہ ”ھَو منی چُک لوگ وَ ہمیش اِنت بلئے تو کا ئے؟ ترا من نہ دیستگ منی دل ءَ تو مئے میتگ ءِ چوریگ یے نہ اِت مہ گُش دروگ“۔۔۔
بچک ءَ پسّہ دات کہ ”ھَو بلّی من چہ شال ءَ اتکگ آں ءُ ناکو مزار منی مات ءِ برات اِنت ءُ منی ناکو اِنت، منی نام کمبر اِنت ءُ من چارگ ءَ اتکگ آں وتی کس ءُ عزیزانی۔۔۔ مارا سک دیر اِنت کہ ما چداں چہ شُتگاں مات ءَ منا گُشتگ کہ کیچ ءَ روئے گڑا ناکو ءُ چُکاں الّم بچار ءُ بیا“ بلّی ءَ سر سُرینت ءُ گُشت بلئے بلئے چو بُگش! یک برے بُگش۔۔۔۔ تو ھان بی بی ءِ بچکُک ءِ، منی چمّ نِزوراں مرچاں پجا نے آراں دو! بلّی ءَ وتی عینک کشیت ءُ سُبک سُبک ءَ دستے شہارت پہ کمبر ءَ ءُ گُشتئِے بیا منی چُک لوگ ءَ انوں دگہ کس نیست، ماہکان ہمدا لوگ ءَ وتی بان ءَ نشتگ بلئے اے چُک و ھبری یے نہ اِنت نازاناں گوں تو چون کنت۔۔۔ بلّی ءَ کمبر ءِ دست گپت ءُ ماہکان ءِ بان ءِ دپ اتک ٹوکیت ءُ توار جت۔۔۔
ماہکان تئی ناکو ءِ بچ اتکگ کمبر تئی چارگ ءَ شال ءَ چہ اَتکگ۔۔۔
ماہکان ءَ کہ انچو نام اِش کُت آ جہسِرت ءُ پاد اتک۔۔۔ گُشئے کہ ہمے روچ ءِ وداریگ بوتگ، چو نوک سرْپتگیں پُل ءِ وڑا بوت آئی ءِ تہا گُشئے نوکیں ساہے ہوار کنگ بوت۔۔۔ کمبروک!!!!! ہمے گپ ءَ گوں ماہکان وتی حیالانی جہلانکی ءَ روان بوت ءُ آ چو سِنگ ءِ وڑا ہما جاگہ ءَ اُوشتیت۔۔۔۔
”کمبر تو مزن بئے ڈاکٹرے بئے گڑا کئی گوما سور کنئے؟ ءُ منا وتی سور ءَ ھال دیئے باریں؟
کمبر ءَ پسّہ داتگ اَت کہ من تئی گوما کناں۔ ماہکان کندیت ءُ گُْشیت کہ من بزاں گوں چُکے ءَ سور نہ کناں منا لج کن، تو منی دیما کسانیں چُکے ئے ہفت سال ءَ ترا چے من مستر آں، ”کمبر ٹک دات ءُ کندگ ءَ لگیت ءُ پدا ماہکان ءِ دستے گیپت ءُ گُْشیت یے کہ ماھو“ من اِنچو کسان نہ آں ءُ من ڈاکٹرے کہ باں گڑا تچان باں ءُ پہ تو کائیاں تو بچار تئی کش ءَ من بُہ اُوشت آں گڑا آ روچ ءَ تو منی دیما گندگ نہ بئے من اَنچو مزن باں“
ھاھاھا کمبروک چونیں ھبر کنئے تو گنوکو! من زاناں شما پدا واتر نہ بئے اِدِا، ءُ تو کہ ڈاکٹرے بئے منا وَ بے ھیال کن ئے شال ءِ شوکیں جنکاں یلہ نہ کن ئے تو پہ من نے ئے۔۔۔۔ ماہکان ماہکان ہچ نہ گُشئے تو جنک! بلّی ءِ توار ءَ ماہکان گُڈینت، ماہکان ءَ گُْشت ہاں ھَو! ماتی اِش کُت۔۔۔
ماہکان ءَ وتی سریگ شر کُت ءُ وتی بان ءِ دروازگ ءِ دپ پچ کُت کہ کمبر آئی دیما اَت ءُ ماہکان ءِ گندگ ءَ بچکندے جتے ءُ بُروان ئِے سُرینت ءُ ماہکان ءَ را اشارہ یے کُت۔۔۔ ماہکان ءِ چمّ گُشئے رژناہ بوت اَنت ءُ آئی ءِ پُر مہریں بچکندگ ءَ گُشئے رنگ رنگیں پُل ریچگ ءَ اَت، انچو گل ءَ بال اَت کہ گُشئے آئی ءِ زند ءِ سرجمیں واہگ پورا بوتگ اَت اَنت، ماہکان ءِ سرا گُشئے اے گرم ءَ اوں نود ءُ ساچان اَت ماہکان ءِ بچکند بند نہ بوہگ ءَ اَت، آئی ءَ چو دُتکے ءِ وڑا وتی گردن چوٹ کُت ءُ چمّ سُرینت ءُ ہمے اَدا ءَ گوں کمبر ءِ نیمگا دست ءِ شہارت ءُ گُشت ئِے منی گنوکو تو اتکئے، وش اتکئے ندراں۔۔۔۔
Discover more from Balochistan Affairs
Subscribe to get the latest posts to your email.