زبیر بلوچ
اکبر بگٹیءِ قتلءَ ایوکءَ سیاسی کلچر ادب ءُ چاگردی اقداراں نوکیں معنا نہ دات بلکیں سیاستءِ ٹپنگ پوائنٹ ثابت بوت نوکیں ٹینڈسی ورناہ آں تحریک دئینت متحرک کننت۔متحرک و پگری ورناہ زہگ زائفگ ءُ نہاڑیانی مزنیں بہرے سیاستءَ اوار بُوھگءات۔ سیاست ترقی پسندانہ مزاج ءُ انٹی فیوڈل ءُ انٹی سردارءِ نظریاتی راہبندے سرءَ دیما جنزان بیت۔ سردار نواب ءُ روایتی مھلوک کہ بلوچے ءُ بلوچ سیاسی تحریکءِ چاگردءِ لس مہلوک ئِے ازلی دژمن آں۔ ایشانی دستءَ چے سیاست دراتک بی ایس اوءِ وانندھیں سنگتانی ءُ لس مہلوکءِ دستءَ اتک۔
اؤلی دورءِ سیاست
سردارنی دستءَ ینگ بلوچ ، بلوچ لیگ ، قلات اسٹیٹ نیشنل پارٹی ءَ کشیتگ ات ءُ سیاسی قیادت لس مہلوکءِ دستءَ داتگ ات بلے بلوچ چاگردءِ اربنائز نہ بوھگ منتشر ءُ شنگ ءُ شانگیں آبادی ءُ ناہموار ترقی ءُ انقلابی قیادتءِ نہ بوھگءِ سببءَ سردار ءُ فیوڈل لارڈاں زُوت کم بیک کُت۔ ہروھدءَ اے مھلوکءَ لوٹ اِتگ کہ سیاست ءُ چاگرد آھانی دستءَ بہ بیت ءُ وتی استحصالی پالیسان سرکارءِ کمک ءُ مدتءَ دیما بہ براں۔ پمیشکہ ایشاں مدام ماریت بلوچءِ گٹءَ داتگ ءُ ایشانی سیاسی معاشی سماجی لٹ ءُ پل کتگ۔ بلے اے باریگءَ پدا سیاست ینگ بلوچ ،قلات اسٹیٹ نیشنل پارٹی، انجمن اتحاد بلوچاں، استمان گل نیشنل پارٹیءِ نظریاتی تسلسلءِ پیڑنءَ بلے خودروانہ بنیادءَ قومی ءُ طبقاتی کسرے گیپتگ ات۔
مسلح مزاحمت کہ ہر وھدا قبائیلی ڈسپلن ءُ قبائیلی سینٹرک بوتگ۔ نوں لس بلوچءِ مزاحمتی جہدے جوڑ بوتگ ات ۔ مکرانءِ لس مہلوک درتہ پچ ءُ گریب ءُ وانندھیں ورناہ جہدءِ مرکزی کردار اِتاں۔ چہ ایشاں سراوان ءُ جھلاوانءِ ورناھاں اسر گیپت ءُ مسلح جھدءِ بہر بوتاں ۔
نوزدہ سدءُ ھشتادءُ شش ءَ بی ایس اوءِ پْروشگ سیاسی کارکنانی ھاس کر بی ایس اوءِ سنگتانی توکءَ بلاھیں مایوسی دلپروشی یے بد دلی یے پیداک کتگ اَت ۔ اے مایوسی ءَ ورناہ بردار کشی، نشہ کلاشنکوف کلچر اسلامی بنیاد پرستی علاقائی تنگ نظری تعصب ءُ رجعتءِ نیمگءَ برت اَنت ۔ شالءَ بی ایس اوءِ سنگت ڈاکٹر سلیم بلوچ طلبا سیاستءِ یک فارگٹن ہیروءِ قتل کنگ بیت پدا زوت فدا احمد قتل بیت ۔
فدا احمدءِ قتل بلوچ سیاسی تاریخءِ یک مزنیں ویل اَت۔ اے قتلءَ سیاستءِ روتگ سُرینت اَنت۔ بی ایس اوءِ پارگ بوتگیں سنگتانی توکءَ فدا احمدءِ وڑیں بود ءُ برکتی اِں سنگت دگہ نیست ات کہ آ دیما بئیت قیادت بکنت۔ سنگت ڈاکٹر حئیءَ دیمءَ کار اَنت چونھا فدا ئے زندءَ ڈاکٹر حئ سنگتاں دیمءَ کتگ ات بلے آ وھدا فدا احمد ءُ سنگتاں پشتءَ چے کلیں کار وتی کوپگاں زرتگ اتاں ءُ ڈاکٹر حئی انچو دیمءَ داشتگ ات۔ ایشیءِ توکءَ سیاسی سِنچ ءُ شعور نیست ات ۔بلے نیستیءَ شمبو گے اَت ۔
اے اسپیسءَ قیادتءِ بحران پیداک بیت ھاس کر ھمے نوکیں نظریاتی زرمبشت کہ بی ایس اوءِ پارگ بوتگین سنگتاں بنا کتگ اَت۔ سک باز اسر مند بیت ۔ اسلءَ اے واکھہ انقلابی ھالاتانی آئیگءِ طوفانے ات بلے ایشیءَ پولیٹیکل لائن آف ایکشنءِ دئیگءِ بدلءَ نظریاتی دھوکہ بازیءِ آماچ کنگ بیت ۔ نظریاتی دھوکہءِ بنیادی وجہ ایش ات کہ اے مھلوکءَ دمبرتگ ات ۔ روسءِ ھالات مٹ بوتگ اتاں ۔ ایشانی زیادہ تر اومیت گوں روس ءُ اوگانستانءِ سرا اِتاں۔ اے زمانگءَ دنیا دو بلاکءَ بھر ات ءُ بلوچ نظریاتی حوالہ سویت کیمپءَ ات۔ گورباچوفءِ گلاسنوٹ ءُ پیرایسٹیریکاءِ پالیسانیاں سببءَ روسءَ نوکیں ڈسکشنءِ پچ کتگ ات ۔ بلے دُراھین چیزاں ابید فداءِ قتلءَ بی ایس اوءِ پروشگءِ دراھیں مایوسی بد دلی دلپروشی لیپگ کت ورناھانی توکءَ نوکیں زندے پیداک بوت ۔ فداءَ وتی ھوناں بلوچ سیاستءِ مرتگیں درچک زندگ کت۔ بلے فداءِ اڑ داتگیں نوک رُدوم گیپتگیں سیاسی گل بلوچستان نیشنل یوتھ مومنٹءِ قیادت نابالیدگی اشتاپ کاری یے شکار بیت ءُ ایشان بیدئے پارلیمنٹءَ دگہ راہ سمجھا نئیت۔ ھمے اشتاپ اشتاپءَ بلوچستان نیشنل یوتھ مومنٹءَ بی این ایمءِ نامہ پارلیمانی جماعتءِ کناں ۔ ہمے رنگءَ بلوچ سیاسی تاریخ یک بلاھیں واکھے قیادتءِ موقع پرستی مصلحت پسندی وجہءَ چے تحریکءِ رنگءَ دیمءَ آرگءَ ناکام بیت۔ بلے فدا احمدءِ ھونءِ برکت نوک جوڑ بوتگیں جماعت 1988ءِ الیکشنءَ مکرانءِ دراھیں حلقہ آں وتی سیٹ آں کاریت ءُ بی این اےءِ حکومتی اتحادی یے بیت۔