لعل جان بلوچ
نکسل وادی جنز 1967 ءَ روبرکتی بنگال ءِ یک دمگے ءَ چہ بندات بیتگ ۔ اے دمگ ءِ نام نکسل وادی اَت ۔ اے جنز ءِ نام ہمے میتگ ءِ نام ءَ گواں بندوک اِنت۔ اےجنزءَ گوں ہمگرنچیں باسک ماؤدوست (ماؤاسٹ) ہم گشگ بنت۔ اے جُنز ءِ اثر گیشترہندوستان ءِ استان چھتیس گڑھ ، آندھرا پردیش ، جھار کھنڈ ، روبرکتی بنگال ، اڑیسہ ءُ بہار ءِ سرءَ کپتگ اَنت۔ جنز ءِ اولی ءُ بُنکی رہشون چارو ماجومدار ءُ کانوسنیال بوتگ اَنت کہ اے دوئیں روبرکتی بنگال ءَ ودی بوتگ اَنت ۔ اے دوئیناں چین ءِ ٹوھیں رہشون ماؤزے تنگ ءِ لیکہ ءُ فلسفہ ءِ چہ اثرزرتگ اَت ۔ اے جنز ءِ مول مُراد تمنی ءُ لگت مالیں مردمانی حقانی پھریزگ اِنت ءُ ہندوستان ءِ تہا کمیونست راجمان جوڑکنگ اِنت ۔
چاروماجومدار ءَوتی جنز ءِ لیکہی پجار ءِ ہاترا ہشت(8) راجدپتری دستاویز نبشتہ کتگ، اے دستاویزمروچی ہم نکسل وادی جنز ءِ لیکہی ءُ فلسفہی بنیاد اَنت۔ نومبر 1967 ءَوھدے کہ کمیونست پارٹی آف انڈیا ( مارکسسٹ) روبرکتی بنگال ءَ گچینکاریاں ءَ بہر زوریت ، اے گچین کاریاں کمیونسٹ پارٹی دومی مستریں پارٹی ءِدروشم ءَ دیما کئیت اِنت ۔ انڈین نیشنل کانگریس بنگال ءُ کمیونسٹ پارٹی آف انڈیا (مارکسسٹ ) اجے مُکرجی ءِ رہشونی ءَ یونائیٹڈ فرنٹ ءِ نامءَ سرکار جوڑ کن اَنت ۔ گڑا چمدءَ چہ کمیونست پارٹی آف انڈیا ( مارکسسٹ) ءِ تہا یک گروپے ودی بیت کہ اے گروپ ءِرہشونیءَ چارو ماجومدار ءُ کانوسنیا ل کنگ ءَ بنت ۔ ایشانی لیکہ ہمیش بیت کہ کمیونست پارٹی آف انڈیا ( مارکسسٹ) ءَ وتی راہ ءُراہبند یل کتگ اَنت ءُ ہندوستان ءِ دستور ءُ آئینءِ راہءُ راہبندانی سرءَ کار کنگ ءَ اِنت ۔ بزاں پارٹی ءَ کمیونسٹ لیکہ ءُ مولءُ مراداں گوں بگیری کتگ ۔
پدا 22 اپریل1967ءَ کامریڈ لینن ءِ بوتن روچ ءَ اے گروپ ءِ باسک یک گلےجوڑکن اَنت کہ آئی ءَ “آل انڈیا کورڈینیشن کمیٹی آف کمیونسٹ ریولوشنری” ءِ نام دئیگ بیت ۔ دیمترا 1969 ءَ کمیونسٹ پارٹی آف انڈیا ( مارکسسٹ۔لیننسٹ ) ءِ شکل ءَ یک گلےدیما آرگ بیت۔چونائیءَ درائیں لکسل وادی گروپانی ہنڈال چہ ہمے پارٹیءَ چہ درکپتگ اَنت ۔ بلئے بازیں تپاوت ءِ سبب ءَ کمیونسٹ پارٹی آف انڈیا (ماؤسٹ) جتائیں رنگ ءَ پیپلز وار گروپءَ کار کنگ بندات کنت ۔چونائیءَ اے گپ ءِ دعویٰ ءَبازیں گروپ کن اَنت کہ آ اصل نکسل وادی گروپ اَنت ءُ آ تمنی ءُ لگت مالیں مردمانی جہگیر ی ءَکنگ ءَ اَنت بلئے کمیونسٹ پارٹی آف انڈیا یک انچیں سیاسی گلے کہ نکسل وادی جنزءِمنشور ءِدیمروی ءِ کنگ ءَ گچین کاری ءَبہر زوریت ۔ایشی ءَ ابید انڈین پیپلز فرنٹ ہم نکسل وادی جنز ءِ سیاسی بہر لیکگ بیت ۔ بلے کمیونسٹ پارٹی آف انڈیا ( ماؤسٹ) ءُ کمیونسٹ پارٹی آف انڈیا ( جانا شکتی ) کامل گوریلا جنگ ءَ ہوار اَنت ۔ 1979 چاروماجومدار دزگیر کنگ بیت ءُ پدا پولیسءِ لٹءُ کٹ ءَچہ کشگ بیت ۔اے نیام ءَ بازیں رہشوں ءُ باسک دزگیر کنگ بنت ءُ بازیں ئےِ کشگ ہم بیت۔
نکسل وادی جنزءِ بابتءَ معتبریں تھنک ٹینک انسٹی ٹیوٹ آف ڈیفنس اسٹڈیز اینڈ انالسس ءِ ریسرچ فیلو نکسلی جنز ءِ کواس اوم شنکر جھانے ڈونچے ویلےءِ گشگ اِنت کہ ” نکسلی جیڑھ ہندوستان ءِ سلامتی ءِ واستہ ٹوھیں خطرہے ءُ حکومت ایشی ءِ توجیل کنگ ءَ جوانیں گام بہ زور ایت ۔” آئی ءِگشگ اِنت کہ” نکسلی جنگ ءُ چوپ ءِ وسیلہءَ وتی سیاسی مول ءُمراداں پیلو کنگ ءِ سرءَ ستک دار اَنت۔سرکارءِ نزوری ءِ سبب ءَ آہانی تہا گیشی آھگ اِنت ۔نکسلی جوانیءَگوریلا جنگ کنگ ءَ اَنت۔
اوم شنکر اے گپ ءَ ہم دیما کاریت کہ “نکسلی جیڑھ ءِیک مستریں سببے راجمانی ءُ معاشی نا بروبری اِنت ۔ آزادی ءَ پد لھتیں علاقہاں گیش معاشی ءُ صنعتی دیمروی کتگ ۔بلئے بازیں ہلک ءُ دمگ ڈالچار کنگ بوتگ اَنت۔ ایشی ءِ سبب ءَ چہ مھلوک ءِ تہا ناوشی ودی بوت ءُ ماؤ دوستاں اے جاور حالاں چہ پائدگ زرتگ ۔آئی ءِ گشگ ءِ ردءَ نکسلیانی گیشتر اثر ہما ہلکءُ دمگاں است اَنت کہ اودءِسر ڈگار چہ زمینءِ چیری گواجناں (نیچرل ریسورسز)مالا مال اِنت ۔ چونائی ءَہم اے دمگ ءِ نندوکیں تمنی مردماں زمینءِ چیری گواجناں چہ ہچ چوشیں نپ ءُ سیت نہ رستگ ۔”
ماؤ دوستانی گورا جدید ایں سلاہ ءِمزنیں مڈی یےاست ۔ بلئے اوم شنکر گشیت کہ ” دنیگتہ ہم آ ہندی (دیسی)سلاہ ہم کا رمرز کن اَنت پہ درور، تیر کمان ، نیزگ ءُ ایدگہ ۔۔ آئی ءَ اے گپ رَد کتگ کہ ماؤدوستاں ڈنی ملکاں چہ سلاہ رسیت، آئی ءِگشگ اِنت کہ ماؤدوستانی گوراکہ نوکیں سلاہانی ا مباراست اَنت اےہما سلاہ اَنت کہ چہ سیکورٹیءِ کارداراں چہ پچ گرگ بوتگ اَنت ۔ آئی گشگ ءِ ردءَ نکسلی اناگہءَ سیکورٹیءِ کاردارانی سرا ارش کن اَنت ءُ وھدے کہ آ وتی رکینگ ءِ ہاتراتچ اَنت گڑا آ ہماہانی سلاہاں زور اَنت ءُ رواَنت ۔”
انسانی حقانی گل پیپلز یونین فار سول لبرٹیز ( پی یو سی ایل) ءِ گمان اِنت کہ تاں وہدیکہ راجمانی نابروبری ھلاس نہ بیت نکسلی جنز روچ پہ روچ دیمروی کنت ۔ پرچاکہ بے دیمپانی ءِمارشت لس مھلوک ءَ لیفٹ ءِ نیمگ ءَرھادگ کنت۔ ءُ آ اے گلانی پلہ مرزیءَ کن اَنت۔ریٹائرڈ پولیس اپسر سبرامنیم ءِ ھیال اِنت کہ” راجمانی ءُ معاشی نابروبری ءِ ھلاس کنگ ءَچہ اےجیڑھءِ توجیل بیت کنت۔آئی ءِگشگ اِنت کہ کوچگی مردم چہ پولیس ءِ ناشری ءَ چہ رکینگ بہ بیت ۔ پرچاکہ وھدے کہ سیکورٹی ءِ کاردار دمگ ءُ میتگاں انگیرءَ کن اَنت گڑا نیز گاریں ءُ غریب تمنیاں گوں ناشری کن اَنت ۔بلئے اے درائیں ناشری ءِعمل ءِ سر ا اپوزیشن ءُ قومی میڈیا توار چست نہ کن اَنت۔ دومی نیمگ ءَ ہندوستان ءِ نندوک ایں 12 کروڑ تمنی وتی پجار ءِ رکینگ ءِ بابت ءَ سک فکر منداَنت ۔تمنیانی مستریں صوبہ جھاڑکھند ءِ اسمبلی ءَیک قرارداد ےگوں تپاکی ءَ من اتگ کہ اے سالءِ مردم شماری ءَ تمنیانی جتائیں پجار منگ بہ بیت۔آہاں ہندو ءِ جاہءَ ” سُرنا ” مذہب ءِ منوگر لیکگ بہ بیت ۔زرباری ہندوستان ءَ ہفت کروڑ آبادیءَ چہ گیش لنگایت فرقہ ہم باز وھدءَ چہ ہمے لوٹ ءَکنگ ءَ اَنت کہ آ ہم ہندو نہ اَنت ۔ ہندوستان ءِ آجوئیءَ چہ پیش انگریزاں ایشانی جتائیں مذہبی پجار من اتگ ۔نکسلی گل ایشانی جتائیں نیکراہی پجارءَ منگ ءَ اَنت پمیشکا اے نکسلیانی پلہ مرزی ءَگون اَنت۔بلئے دومی نیمگ ءَ سرکار ءُ ہندو ستک ءِ گل ایشاں ہندونیکراہءِ بہر سرپد بنت ۔
کانگریس پارٹی ءِ رہشون مہندر کرماءِسروکی ءَ نکسل وادی جنز ءِ تاوان دئیگ ءِ ہاترا پرائیویٹ لشکرے ” سلوا جدوم “ءِنام ءَ جوڑ کنگ بوت۔مہندر کرماءِ پشت یک نیمگے ءَ بُنجائی سرکار اَت ءُ دومی نیمگ ءَچھتیس گڑھ ریاستءِ سرکار ءَہم ایشیءِ پلہ مرزی کت ۔ وھدے کہ بے ۔ جے ۔پی ءِاے ریاست ءَ سرکار جوڑ بوت گڑا آئیءَ ہم سلواجدوم ءِ پلہ مرزی کت ۔اے پرائیویٹ لشکر ءَدمگی تمنیانی ھلاپءَ انچیں ترندیں گام گیج زرت کہ تمنیانی تہا ترسے کپت ءُ ہمے گمان کنگ بوت کہ اےجنز ءِ اثر ھلاس بوتگ اَنت ۔
نکسل وادی جنز ہندوستان ءِ واستہ یک ٹوھیں جیڑھےءِ دروشم ءَ دیما اتکگ ۔ اے جیڑھ ءَیک انچیں رنگے زرتگ کہ اینچو زلم ءُ زوراکی ءَ ابید ہم اےجنز ھلاس بوھگ نہ اِنت پرچاکہ لس مھلوکءِ اڑءُ جنجالانی دنیگتہ توجیل کنگ نہ بوتگ ۔ہندوستان دنیا ءِ تہا ٹوھیں جمہوری استانے لیکگ بیت بلئے وھدے کہ ہمے جمہوری استان ءِ تہا لس مھلوک ءِ حق ڈالچار کنگ بنت ءُ آہانی سر ڈگار ءِ مال مڈی پُلگ ءُ ورگ بنت ءُ لس مھلوک زلم ءُ زوراکی ءِ آماچ کنگ بیت ،گڑا الم سر ڈگار ءِ مردم جمہوری عملءَ چہ دلگران بنت ءُ سلاہ بند یں جہد ءَ گوں بندوک بنت۔
شوندات :۔
1 ) D.W بھارت میں نکسل ازم ایک سنگین مسئلہ :
2 (افتخار گیلانی : مکتوب دہلی ۔ ڈیلی 92 نیوز ۔
لعل جان بلوچ نبشتہ کار ءُ رجانکارے۔ آئی ءِ بازیں نبشتانک ءُ رجانک جتا جتائیں سرحالانی سرا چاپ بوتگ اَنت۔ آئیءِ دو پٹءُ پولی نبشتانکانی کتاب چاپ بوتگ۔