زبیر بلوچ
بی ایل ایم، بی پی ایل ایف، بی ڈی وائی بِہ زاں بلوچ ڈیموکریٹک یوتھ چریشاں ابید نوکیں دؤرے چیریں گل بی ایل اے، بی ایل ایف، بی آر اے، بی این اے وغیرہ بہ بنت کُلیں گَلانی چوں پیشی گلانی وڑا یک چیزے یک وڑ انت۔ آ تنظیم ءُ تنظیمی ہدف پولٹیکل وژن کریٹیو تھنکنگ ءُ ریولُوشنری اسٹریٹیجی یے نہ بوہگ انت۔
نوزدہ سدءُ بست ءِ جوڑ بوتگیں ینگ بلوچ ءُ مرچگیں جوڑ بوتگیں مسلح ءُ غیر مسلح تنظم کُل یک ھساب ءَ اَنت۔ داں روچ ئِے مروچی بلوچ ءِ جُھد سد سال ءِ دراجیں سفرے یے پَند بُرّگ ءَ رند ھوں چیریں گل ءِ میکینزم ءَ سرپد نہ انت۔تنظیمی کار نہ زاننت۔ سبب چے انت؟
کجام نزوریاں تنظیم ءُ سیاست چوں اے رنگ ءَ لگانڑو کتگ انت۔ اے بلاھیں انٹیلیکچول باوستے۔
ھمے نزوری بلوچ ءِ پارلیمانی ءُ غیر پارلیمانی جُھد ءِ ھردوکانی تہ ءَ است انت ھردو تنظیمی نزوریانی سبب ءَ چہ لس مہلوک ءَ آئسولیٹ اَنت ھردوکانی فین فالونگ تھنا وتی ھاصیں گروپ ءِ تہ اَنت ھردوک چہ لس مھلوک ءَ دور اَنت تھنا وتی ممبراں ءُ فالوراں محدود آں۔
مرچی بلوچ ءِ قومی ءُ راجی جنز آئسولیٹ انت سوال ایش انت پرچہ آئسولیٹ انت ؟
آیا بلوچ ءِ لیڈرشپ ءَ را اے سما انت کہ جنز ائسولیٹ انت ؟
آیا بلوچ ءِ راجی جنز ءَ دنیا ءِ کجام قوت ءِ دلگوش گوں وت گور کتگ ئِے ؟
کجام علاقائی قوت ءِ دلگوش گوں وت گور کتگ ئِے ؟
دگرا بل پھٹان، سندھی، مہاجر ءُ سرائیکی مھلوک ءِ گوما چے رنگیں سیاسی تعلق داری است اِنت ؟
کرد بلوچ راجی جنزے باروا ءَ چے زان اَنت ؟
باسک بلوچ ءَ زان اَنت ؟
کجام مظلوم طبقہ محکوم قوم بلوچ ءِ راجی جُنز ءِ پلہ مرز کنگ ءَ اِنت ؟
مرچگیں بلوچ ءِ راجی جنز تھنا بلوچ راج ءِ سیاسی معاشی ثقافتی ھق ءِ جنگ انت پدا بلوچ راج ءِ تہ ءَ ھوں مزنیں حمایتے زورگ ءَ سوب مند نہ اِنت پمشکہ، اے جنگ چہ دنیا ءَ چے آئسولیٹ ءُ بیگانیں جُھدے۔
زمانگ ءِ دنیا ءَ دو کیمپانی تہ ءَ بھر بوتگ مرچی دو کیمپاں چے گیشتر کیمپ اَنت۔ آیا بلوچ ءِ لیڈر شپ ئِے تہ ءَ اے سما است انت کہ دنیا مرچی چنچو کیمپ آں بھر انت ءُ بلوچ من حیثیت القوم وتی قومی نپ ءُ سیتاں کجام کیمپ ءِ نزیکی ءَ رکین کت کنت۔
بلوچ وتی جنز ءَ عالمی سطح ءَ ھما پیمانہ بِہ بارت کہ دُراھیں مھکوم ءُ مظلومیں راجانی بلاک جوڑینگ ءَ سوب مند بہ بیت۔ گڑا دنیا بلوچ ءِ راجی جنز ءَ منّیت ءُ ساڑاھیت پرچا مرچیگیں دنیا طاقت ءُ انٹرسٹ ءِ دنیا انت۔
محدودیت ءُ آئیسولیشن راجی جنزانی واست ءَ ھما شُومک ایں رِیش انت کہ آ چہ تہ ءَ وران کنت ءُ نزور کنت۔ مرچی بلوچ ءِ جُنز ءَ ھمے وڑ آئسولیشن ءُ محدودیت تہ ءَ چے وران انت بلے تنیگہ سما کپگ ءَ نہ انت بیماری وتی ابتدائی اسٹیج ءَ انت بلوچ لیڈر شپ وتی دلگوش ءَ اے مزنیں بیماری ءُ نزوریانی نیمگ ءَ گور بِہ کننت۔ وتی پالیسیانی سرا چار ءُ بِہ چار بِہ کننت۔ جھد ءَ پراہ ءُ شاھیگان بِہ کننت دنیا ءِ درائیں پدمنتگیں نیزگاریں ایر دستیں راجانی گوما گوں وت آوار بِہ کننت۔ بلوچ راج ءِ سرا مرچی گرانیں ساھت اتکگ اَنت دژمن طاقت ور انت توانگریں دژمنے۔ اے رنگیں دژمن ءَ گوں تھنا مڑھگ نہ بیت۔ تپاکی ءَ گوں جُھد دیم ءَ برگ لوٹیت۔ تپاکی المی انت۔ بلوچ ءِ جنز ءِ واست ءَ جوانیں سراں وتا کربان کتگ ءُ اے کربانی بے سوب نہ بنت۔۔
۔۔۔روان انت۔۔۔۔
دلگوش: اے نبشتانک ءِ تہا درائیں حیال ءْ مارشت نبشتہ کار ءِ جند ئیگ انت۔ بلوچستان افیئرزءِ ادارہ ءِ ایشاں گوں تپاک بوھگ المی نہ انت۔