متحدہ عرب امارات (یو اے ای) کے صدر شیخ محمد بن زید النہیان نے بدھ کے روز اپنے بڑے بیٹے شیخ خالد بن محمد بن زید النہیان کو ریاست کا ولی عہد مقرر کرنے کے ساتھ ہی اپنے بھائیوں کو بھی بعض اعلیٰ عہدوں پر تعینات کر دیا-
ابوظہبی متحدہ عرب امارات کا دارالحکومت ہونے کے ساتھ ہی امارات کی سات ریاستوں میں سب سے امیر ریاست ہے۔
شیخ خالد بن محمد بن زید النہیان اب اس کے ولی عہد ہیں۔ یہ عہدہ روایتی طور پر اس بات کی نشاندہی کرتا ہے کہ ریاست کا اگلا صدر کون ہو گا۔
ولی عہد کے طور پر شیخ خالد کی تقرری سے ابوظہبی میں اقتدار کی مرکزیت کو مزیدتقویت ملی ہے، جس کے پاس سن 1971 میں متحدہ عرب امارات کے قیام کے بعد سے ہی، ملک کی صدارت ہے۔
