چین نے کہا ہے کہ امریکا چین کے حوالے سے غلط معلومات پھیلانے اور اسکی داخلی و خارجہ پالیسی کو بدنام کرنے کی کوشش کر رہا ہے

چین نے امریکی وزیر خارجہ انٹونی بلنکن کی اس تقریر پر شدید نکتہ چینی کی ہے، جس میں انہوں نے دنیا کی دو بڑی معیشتوں کے درمیان طاقت کے توازن پر توجہ مرکوز کرانے کی کوشش اور چین کی پالیسیوں پر تنقید کی تھی۔ چینی وزارت خارجہ کے ترجمان نے اس خطاب کو امریکہ کی طرف سے ’غلط معلومات پھیلانے اور چین کی داخلی و خارجہ پالیسی کو بدنام کرنے کی ایک کوشش‘ قرار دیا ہے۔ بلنکن نے اپنے خطاب میں کہا تھا کہ چین کو روکنے اور اس کا مقابلہ کرنے کے لیے بین الاقوامی برادری کو متحد ہونے کی ضرورت ہے۔ اس خطاب کے مطابق امریکہ کے خیال میں چین، ’’بین الاقوامی نظام کے لیے سب سے سنگین اور ایک طویل مدتی چیلنج ہے‘‘۔ حالیہ مہینوں میں چین نے پہلے سے زیادہ جارحانہ موقف اختیار کیا ہے اور بحیرہ جنوبی چین کے مصنوعی جزیروں پر اپنی عسکری قوت میں بھی اضافہ کر دیا ہے۔ اس نے تائیوان کے خلاف اپنی بیان بازی کو بھی تیز کر دیا ہے۔