کوئٹہ: جبری لاپتہ افراد کے لواحقین کا احتجاج ریڈ زون میں جاری

لاپتہ بلوچوں کے لئے آوازاٹھانے والی تنظیم وائس فارمسنگ پرسنزاورلاپتہ بلوچوں کے لواحقین کی جانب سے زیارت آپریشن کے جعلی مقابلے میں لاپتہ بلوچوں کوقتل کرنے کے بعدگورنرہاؤس ریڈزون میں 47دنوں سے دھرنا دیا جارہا ہے۔ دھرنا اُن دو دنوں میں بھی جارہا جب کوئٹہ میں مسلسل 30گھنٹوں سے بارش ہوئی تھی،لاپتہ بلوچوں کے لواحقین ٹینٹوں میں سخت سردی اور مشکلات میں گھرے ہونے کے باوجود دھرنا دئیے بیٹھے رہے، اس دوران لاپتہ شبیربلوچ کی ہمشیرہ سیما بلوچ، ڈاکٹردین محمد بلوچ کی صاحبزادی سمّی اور لاپتہ راشد حسین کی بھتیجی ماہزیب کی طبیعت بگڑگئی تھی جنہیں طبی امداد فراہم کی گئی تھی۔ لاپتہ بلوچوں کے لواحقین کے مطابق وہ اپنے آئینی حق کے لئے لڑرہے ہیں لاپتہ افراد کی بازیابی اور ان کی جانوں کو نقصان نہ پہنچانے کے حکومتی موقف اور یقین دہانی تک بیٹھے رہیں گے۔