زیارت آپریشن، مشیر داخلہ بلوچستان نے 5 مقتولین کے نام لاپتہ افراد کی فہرست میں ہونے کی تصدیق کردی

بلوچستان کے مشیر داخلہ ضیاء لانگو نے زیارت آپریشن میں پاکستان سیکورٹی فورسز کے ہاتھوں مارے جانے والے 9 میں سے 5 افراد کے نام لاپتہ افراد کی فہرست میں موجودگی کی تصدیق کردی۔ صوبائی مشیر داخلہ ضیاء لانگو نے کوئٹہ پریس کلب میں پریس کانفرنس کرتے ہوئے کہا کہ زیارت میں آپریشن کے دوران مارے گئے افراد کے نام مسنگ پرسنز کی لسٹ میں شامل تھے۔ آپریشن زیارت میں کرنل لئیثق اور کزن عمر جاوید کو اغوا کرنے کے بعد قتل کیا گیا تھا۔ جس کی ردعمل میں سیکورٹی فورسز نے زیارت آپریشن میں 9 بلوچ مزاحمتکاروں کو مارنے کا دعویٰ کیا تھا- دوسری جانب اب تک ان 9 افراد میں سے 5 کے لواحقین نے تصدیق کی ہے کہ مارے جانے والے ان افراد کو بلوچستان کے مختلف علاقوں سے مختلف اوقات میں سیکورٹی فورسز کی جانب سے جبری گمشدگی کا شکار بنایا گیا تھا جس کے خلاف لواحقین نے احتجاج بھی ریکارڈ کرایا تھا- لواحقین کا کہنا ہے کہ مارے گئے افراد سیکورٹی فورسز کی تحویل میں تھے جنھیں جعلی مقابلے میں قتل کرکے مزاحمتکار ظاہر کیا گیا-