کراچی۔ ذرائع کے مطابق خضدار سے تعلق رکھنے والے دو چچازادبھائی اور پسنی کے رہائشی طالب علم کو نامعلوم افراد نے اغواکرلیا۔
لاپتہ ہونے والے نوجوانوں کی شناخت محمد ولد محمود، عاصم ولد محمد اعظم سکنہ جعفرآبادخضدار اور معراج اسلم ولد محمد اسلم سکنہ پسنی ببر شور کے ناموں سے ہوئی ہے۔
خضدار کے لاپتہ نوجوانوں کے اہلخانہ کے مطابق دونوں نوجوانوں کو 16جون 2023 کو حراست میں لے کر لاپتہ کردیا ہے۔
اہلخانہ نے انسانی حقوق کے اداروں سے دونوں نوجوانوں کی بازیابی کےلئے اپنا کردار ادا کرنے کی درخواست کرتے ہوئے کہاہے کہ انکے پیاروں کی بحفاظت بازیابی کیلئے ان کی آواز بنیں، اس سے پہلے کہ دیر ہوجائے یا سی ٹی ڈی خدانخواستہ جعلی مقابلے میں انہیں نقصان پہنچائے۔
انہوں نے کہا ہے کہ ہم حکومت سندھ سے اپیل کرتے ہیں کہ انہیں پولیس اور رینجرز سے پوچھنا چاہیے کہ دونوں طالب علموں کو 15 دن گذرنے کے باوجود کیوں کسی عدالت میں پیش نہیں کیا گیا ہے۔
دوسری جانب پسنی کے رہائشی لاپتہ ہونے والے نوجوان کے بارے میں ذرائع کا کہنا ہے کہ پسنی ببرشور رہائشی نوجوان معراج اسلم ولد محمد اسلم کو یکم جون 2023 کو کراچی کے علاقے کلفٹن سے جبری طور پر لاپتہ کردیا گیاہے۔
ذرائع کے مطابق معراج اسلم آپٹک انسٹی ٹیوٹ آف ٹیکنالوجی کراچی کا طالبعلم ہے۔
