Home / Archives / Analysis / محمد بیگ بیگَل ءِ بیرانی

محمد بیگ بیگَل ءِ بیرانی

۱۲ اپریل ۲۰۱۷ ءَ ماں کراچی ءَ بیران بوت آئی ءِ بیرانی اے حاترا تورناک انت کہ آ بلوچی لبزانک ءَ دل پہکیں ءُُ سگ ءُُ اوپاری ندکارے ات ،ندکارے ءِ درچ ءَ آئی ءِ گورا وتارا پیش دارگ ءُُ وت گلاہی وڑیں عیب نیست ات کہ بلوچی ندکارانی زنڈیں عیب اَنت۔محمد بیگ یک جون ۱۹۳۶ ءَ کراچی ءَ ودی بوتگ آئی ءِ آرپیں پت ءِ نام محمد قاسم ات آئی ءِ دوچک ات انت انور بیگ ءُُ ناصر بیگ کہ آہانی تہا انور بیگ پدا بیران بوت ءُُ ناصر بیگ آئی ءِ پشت پدی ءَ زندگ انت ۔ محمد بیگ بیگل بلوچ لبزانک ءِ وانندہ تریں مردماں شمار بوت بلئے آئی ءِ مکتبی علم ءُُ زانت انٹرمیڈیٹ ات کہ آئی ءَ چہ ایس ایم کالج کراچی ءَ در برت ۔آئی ءِ میڑک ءِ چکاس ہم چہ ایس ایم کالج ونتگ ۔آئی ءِ پرائمری چہ پرائمری سندھی گلام حسین قاسم اسکول لیاری ءَ دربرت ۔واجہ محمد بیگ بلوچی زبان ءِ بنداتی جہدکارانی درچ ءَ ہوار ات کہ آئی ءَ بلوچی ءِ دیمروئی کاراں سک بہر زرت ۔اے درچ ءَ بلوچی اکیڈمی ءَ ۲۰۱۴ ءِ عالمی کانفرنس ءَ آئی ءَ گشتگ ات کہ ’’ ہما مردم مرچی کہ بلوچی زبان ءِ پدمنتگی ءِ گپ ءَ جن انت آ ۱۹۴۹ ءَ ماں کراچی ءَ ریڈیو پاکستان کراچی ءِ مراگشانی حال ءَ سرپد نہ اَنت ،آ سرپد نہ انت کہ بلوچی اکیڈمی ءَ ۱۹۵۹ ءَ’’ مستاگ ‘‘چوں چاپ کت ،آسر پد نہ انت کہ ۱۹۸۱ ءَ سید ہاشمی اکیڈمی’’ سنج‘‘ چوں چاپ کت ‘‘۔ آئی ءِ اے دانکاں درا بیت کہ بلوچی ءِ بنداتی کارانی جکانسری ءَ ہوار ءُُ ہور بوتگ ۔محمد بیگ بیگل سندھی ،اردو ،فارسی ،انگریزی ءُُ بلوچی ءَ نبشتہ کت بلئے آئی ءِ درشان ءِ در ءُُ ساہگ آئی ءِ ماتی زبان بلوچی ات البت آئی ءَ سندھی ،اردو ،فارسی ءُُ انگریزی ءَ ہم نبشتہ کتگ ۔آئی ءَ وت وتی آزمانکانی ماں انگریزی ءَ ترینت ءُُ The prize ءِ نام ءَ ماں بلوچی اکیڈمی کوئٹہ ءَ چاپ کت انت ایشیءَ ہوار آئی ءَ عطا شاد ءِ بازیں شیئرے کانگرس لائبریری امریکہ ءِ گشگ ءِ سرا رجانک کت اَنت ۔ہمے وڑا بیگ محمد ءَ تنویر عباسی ءِ سندھی لچہاں ماں انگریزی رجانک کت The prize ءَ ابید بیگل ءَ ایندگہ ہپت کتاب انت بلوچی گرائمر( اردو ،میجر موکلر رجانک) نلیں زر ،شکل ءُُ ماجین،زنڈیں دپار،جوکر ،برزخ ،منی برات( فاطمہ جناحءِ وتی برات محمدعلی جنا ح ءِ زند ءِ سرا نبشتگیں انگریزی کتاب my brotherءِ رجانک انت کہ اردوءَ ’’ میرا بھائی‘‘ ءِ نام ءَ ہم رجانک کنگ بوتگ )اگاں چہ بیگل کسمانک ،نگد( پیش گالاں ابید آئی ءِ بازیں نبشتانک ءُُ تران) آزمانک ءُُ سپر نامگ نبشتہ کت ءُُ بازیں کتاب رجانک ہم کتگ بلئے آئی ءِ بورتاچی ءِ پٹ تژن ءُُ کند ات۔بلوچی لبزانک ءَ تژن ءُُ کند ءَ سک نامدار ات ۔آئی ءِ تژن ءُُ کند ایوک ءَ درشانی ( بیانی) رنگ ءَ دیم ءَ نیاورت انت بلکیں آئی ءِ حاترا وتی جند ءِ تکنیک ہم کارمرز کت انت چوکہ گورنمدی ءُُ سپرنامگ بلئے چوکہ محمد بیگ سکیں وانندگیں مردمے ات پمشکہ آئی ءِ تژن ءُُ کند لس بنگپانی سرا نہ اَنت بلکیں چاگردی ،راجی ءُُ زانتی ئیگ انت کہ آہانی وانگ ءَ وانوک ءَ بازیں سرپدی دست کپت ایت ءُُ ہمے درچ ءَ وانوک وتی جندءِ باتن ءِ بازیں عیب ءُُ حرابیاں ( اگاں چمے پِر بہ بیت) ہم سرپد ءُُ آشنا بیت۔
محمد بیگ ءَ بلوچی ادبی جہد کار بانلی نیمگ ءَ تژن ءُُ کندی داد ۲۰۱۵ ءَ بلوچی بہرگ ءِ نیمگ ءَ گوں ظفر علی ظفر ءَ ہوار عہد بستگی داد ہم دئیگ بوتگ۔یک زمانگے چہ کویت(لبزانکی گل)ءِ نیمگ ءَ’’بیگَل داد‘‘ نام ءَ یک لبزانکی دادے ہم برجم داشتگ۔
’’ حدا محمد بیگ بیگل ءَ بہشت ءَ جاہ بدنت( آ مین)

بشکریہ: ڈیلی آزادی

Share on :
Share

About Administrator

Check Also

PTI voted for Sanjrani on ‘order from top’: Sirajul Haq

LAHORE: Questioning the credibility of the Senate after its recent elections and adding fuel to …

Leave a Reply

'
Share
Share
Social Media Auto Publish Powered By : XYZScripts.com